Cerito Bae : Buk Kadis Samo Ketuo

Buk Kadis Samo Ketuo
Foto istimewa. (Ist)

Satu hari, ketuo ni, Bujang, ado dinas di luar daerah. Waktu tu dio pegi serempak Kulup.

Nah, sesamo lah dio di hotel tu. Nginap lah kan.

Habis acara dinas, Si Bujang ngota-ngota lah samo Kulup dan kawan-kawannyo yang lain.

Tetibo Bujang yang ketup ni mintak izin balek ke kamarnyo.

“Litak nian badan ko, nak bawak tiduk dulu brother,” kato ketuo tu samo Kulup dan lain-lain.

Yo Kulup samo yang lain-lain maklum be, kan memang capek seharian acara. Jadi wajar be kalo Ketuo Bujang litak badannyo. Dio bae litak jugo rasonyo.

Pegi lah Bujang bejalan ke kamarnyo. Si Kulup samo kawan-kawan masih lah santai-santai di loby hotel.

Nah tau-tau ado Buk Kadis yang tibo, jalannyo cepat nian masuk hotel tu. Si Kulup samo yang lain jadi penasaran lah kan, nak ngapo Buk Kadis tu ke sini.

Jadi pegi lah orang ni ngikutin Buk Kadis tu diam-diam. Ruponyo Buk Kadis bejalan masuk ke arah kamar Bujang.

“Apohal Buk Kadis ke kamar Bujang. Buk Kadis ni lah belaki, Bujang lah bebini, nah dak beres ni,” kato Kulup ke kawan-kawannyo.

Kawan-kawannyo yang lain cuma geleng-geleng be.

Habis tu semuanyo balek ke loby hotel. Ngota-ngota lagi.

Sejam kemudian, Buk Kadis nampak keluar loby, sambil nunduk dio bejalan cepat.

“O Buk, apohal samo Bujang tu,” tegur Kulup.

Buk Kadis tekejut. “Dak do, main catur,” kato Buk Kadis.

Kesal Kulup, dio belari ke kamar Bujang. Pintu kamar Bujang tebukak, Kulup langsung masuk.

“A yo nian ruponyo. Main catur kamu,” kato Kulup. Bujang yang lagi duduk depan papan catur kecik tu bingung.

“Ketemu Buk Kadis yo tadi. Nyo tu guru catur sayo brother,” kato Ketuo Bujang.

“Yo yo. Maaf suudzon. Dah lah, main pulak kito,” kato Kulup.

Akhirnyo orang beduo tu main catur sampai pagi.

– Tamat –

Ads

Pos terkait

---

Video Restoran Masakan Jepang Sushimaru - Kuliner Jambi Seru

Video Jalanan Kersik Tuo Kerinci - Journey Travel Jambi Seru

Ads

Konser BTS - Jambi Seru

Kecelakaan Hari Ini - Jambi Seru

Harga Emas Jambi - Bisnis Jambi Seru

Gubernur Jambi Al Haris Kunjungan - Berita Jambi Seru

Gubernur Cup - Bola Jambi Seru

Ulasan Film Layangan Putus - Jambi Seru

-